| Perfil de ßεŷōńd◦ஐ˚◦ ๑ღ ◦ஐ˚◦ ๑ღ .. Beyon...FotosBlogListas |  Herramientas  Ayuda |
|
26 diciembre قبلكقبلك .. كنت محتاجلك
تلاقيني
و تديني
ملامح عمري و سنيني
و ترسم لي
علي جبين الزمن .. ضحكة
تواسيني
اذا مرت اوام .. أيام
و فُتيني
انا قبلك كنت شيء تاني
و لا عمري حسبت العمر بدقايق
و لا ثواني
و عايش دنيتي رحال
مع الترحال .. و أحلامي
و ماشي .. بس متحير
و غربة في قلبي وجعاني
و ألف سؤال يسلمني ..لألف سؤال
لإمتى يا قلبي هستنى علي دا الحال
.عشانك بس تلاقيني ..و تاخديني
16 diciembre عصفورتي ماتت الموضوع قد يعتبره البعض تافه
يعني من الآخر اصحاب القلوب الغير رقيقة يمتنعون
:
:
للموت رهبة
سواء في البني آدمين او في الحيوانات
بس ساعات بعض البني آدمين بيعتبروا موت الحيوان شيء ليس له قيمة
بدليل انه احيانا بنسمع مثل بيقول آهو كلب و راح
و كأن الكلب دا مكنش روح أو ان ربنا خلقه بلا فائدة
:
:
يعني الموضوع أولا و أخيرا عن روح
أما ما بين الــ أولا و الــ أخيرا فهو طائر و انا فعلا اتعلقت بيه
و دا لأن جي جي كانت فعلا ألوفة جدا و حبوبة
كمان مكنتش بتخاف مني و كانت بتيجي لايدي و تنقرني في صوابعي
:
:
مفكرتش اني هضطر في يوم من الايام اني اتحط في موقف الكبار
اللي مضطرين يخبوا علي الصغيرين نبأ موت طائر او حيوان أليف
لطيف انك تكون صغير
يدوروا لك هما علي المبررات
و يشيلوا عنك
يرتبوا لك مشاعرك بحيث انها متتكركبش علي بعضها في اسئلة من نوعية ليه و ازاي
تتفاجيء بالوضع الجديد ذو المبرر المقنع و تستمر الحياة
حتي لو حبيت تعيط هتعيط براحتك .. علي اساس انك صغنن
اكيد دا يبقي شيء لطيف
:
:
بعد هدوء العاصفة.. الداخلية طبعا
و رغم عدم اعتيادي على عدم وجود جي جي
كان لازم اجيب لــ أون أون حد
منظره يقطع القلب اساسا
حتي معدش بيزقزق
و رغم ان تينا جميلة شكلا يعني احلى من جي جي الله يرحمها
لكن هو مش قابلها لسة طبعا
دا غير انها شقية جدا جدا
و استولت علي المرجيحة كمان رغم انها كانت مكان اون اون المفضل
و هو يا حرام واقف ع المجثم مش بيغير مكانه غير للاكل بس
و نظرته حزينة جدا
:
:
جي جي و أون أون هما اول بادجي أربيه
و هما أول عصفورتين عرفت منهم ليه الناس بتقول علي أي اتنين بيحبوا بعض انهم جوز عصافير
كانوا بيبهجوني جدا الصبح بدري بصوتهم و خصوصا لما يعلا
و منظر قرقشتهم لمناقير بعض كانت بتضحكني اوي
خصوصا انهم تقريبا طول الوقت بقهم في بق بعض
كمان كانوا بيتبسطوا اوي لما يسمعوا فيروز او اغنيلهم حاجة ليها
:
:
أون أون كنت بقول عليها دايما مغرور
و ساعات كنت اقرب منه و اقوله قول ورايا انا مش طاووس انا عصفور
فعلا كان بينرفزني
طول الوقت بيرتب في ريشه و خصوصا ديله و هو ماشاء الله جميل
حتي جي جي كانت تفضل وقت طويل تنضفه
كمان مكنش ياكل من فاكهة او خضار غير لما جي جي تاكل منه و تدوقه و بعدها ياكل
لكن مع الوقت لاحظت انه هو كمان بيحبها و بياكلها
هي جي جي كانت حنينة جدا و ألوفة جدا
كنت لما ادخل ايدي في القفص تنزل في ارض القفص ليا
اول مرة مسكتها لما اتعورت و حبيت اطهر لها الجرح
مبطلتش سريخ و عض فيا
لكن مع الوقت اخدنا علي بعض
و لما جيت اغيرلهم القفص و جبت لهم قفص كبير
اول ما جيت امسكها جت لايدي و مقالتش اي حاجة..عضة واحدة و من غير فلفصة
بس للاسف تاني يوم ماتت
:
:
الغريب انها كانت عادية جدا بتلعب و بتاكل طبيعي اوي
فاكراها قبل المغرب بشوية كانت بتاكل من المحار و الحبوب
و بتتنطط مع أون أون عادي
طلعت بعد المغرب اغطيهم
اتفاجئت بــ أون أون شكله غريب جدا و واقف زي ما يكون خايف
قربت قلتله مالك عامل كدا ليه
ببص تحت لقيتها "متكومة" في طبق الاكل
:
:
كان نفسي تبقى مغمي عليها بس
مع ان بيتهيألي مفيش عصافير يغمي عليها
موقف كان وحش اوي
و اني اضطر افتح القفص و اشيلها و افحصها
و احاول استوعب انها ماتت
و ما يترتب علي ذلك من احداث
و احباط و اكتئاب
:
:
يارب أون أون يحب تاني
و تينا تبقي حنينة عليه زي جي جي
لانه يستاهل
Life goes on و لأن
 :
:
: |
|
|
